ക്രിസ്റ്റ്യാനോ റൊണാള്ഡോയുടെ അല് നസ്ര് ടീമിലേക്കുള്ള തിരിച്ചുവരവ് വീണ്ടും വൈകുന്നു. ലോകകപ്പിന് ശേഷമുള്ള റൊണാള്ഡോയുടെ അവധി നീട്ടി നല്കാന് അല് നസ്ര് പരിശീലക സംഘം തീരുമാനിച്ചതോടെയാണ് ഇത്. പോര്ച്ചുഗീസ് താരത്തിന്റെ വ്യക്തിജീവിതത്തെക്കുറിച്ചുള്ള പുതിയ അഭ്യൂഹങ്ങള് പ്രചരിക്കുന്നതിനിടയിലാണ് ഈ നീക്കം. റൊണാള്ഡോയും പങ്കാളി ജോര്ജീന റോഡ്രിഗസും തമ്മിലുള്ള വിവാഹം ഉടന് നടക്കുമെന്ന വാര്ത്തകള് കാട്ടുതീ പോലെ പടരുന്നുണ്ടെങ്കിലും ഇവ പരസ്യമായി തള്ളിക്കളയുന്ന സൂചനകളാണ് പുറത്തുവരുന്നത്.
വിശ്രമം അനുവദിച്ച് അല് നസ്ര്ഫുട്ബോള് ലോകകപ്പിലെ പ്രീ ക്വാര്ട്ടറില് സ്പെയിനിനോട് തോറ്റ് പോര്ച്ചുഗല് പുറത്തായതിന് ശേഷം റൊണാള്ഡോ ഇതുവരെ അല് നസ്ര് ടീമിനൊപ്പം ചേര്ന്നിട്ടില്ല. ആഞ്ചെ പോസ്റ്റെകോഗ്ലുവിന്റെ നേതൃത്വത്തിലുള്ള അല് നസ്ര് പരിശീലക സംഘം 41-കാരനായ റൊണാള്ഡോയെ ധൃതിപിടിച്ച് കളത്തിലിറക്കേണ്ടതില്ലെന്നും പുതിയ സീസണിന് മുന്നോടിയായി കൂടുതല് വിശ്രമം അനുവദിക്കാമെന്നും തീരുമാനിക്കുകയായിരുന്നു. അറബ് മാധ്യമങ്ങള് ഉള്പ്പടെ ഇക്കാര്യം റിപ്പോര്ട്ട് ചെയ്തിട്ടുണ്ട്. ഇതനുസരിച്ച്, സൗദി പ്രോ ലീഗില് അല് ഫത്തേയ്ക്കെതിരായ ആദ്യ മത്സരത്തിലും കിങ്സ് കപ്പില് അല് ദിരിയയ്ക്കെതിരായ പോരാട്ടത്തിലും റൊണാള്ഡോ കളിക്കില്ലെന്നാണ് റിപ്പോര്ട്ട്. ഓഗസ്റ്റ് 21-ന് അല് റിയാദിനെതിരെയുള്ള മത്സരത്തിലൂടെയാകും താരം മൈതാനത്തേക്ക് തിരിച്ചെത്തുക. ലിസ്ബണിലെ പ്രീ സീസണ് ക്യാമ്പ് പൂര്ത്തിയാക്കി ഓഗസ്റ്റ് അഞ്ചിന് അല് നസ്ര് ടീം റിയാദില് തിരിച്ചെത്തിയിരുന്നു.
വിവാഹ വാര്ത്തകള് നിഷേധിച്ച് കുടുംബംറൊണാള്ഡോയുടെ അവധി നീട്ടിയതോടെ, തന്റെ പങ്കാളിയായ ജോര്ജീന റോഡ്രിഗസുമായുള്ള വിവാഹത്തിനായാണ് താരം സമയം കണ്ടെത്തുന്നത് എന്ന തരത്തില് വാര്ത്തകള് പ്രചരിച്ചിരുന്നു. എന്നാല് റൊണാള്ഡോയുടെ കുടുംബത്തോട് അടുത്ത വൃത്തങ്ങള് ഇക്കാര്യം നിഷേധിച്ചു. റൊണാള്ഡോയുടെ സഹോദരി എല്മ അവെയ്റോ ഇന്സ്റ്റാഗ്രാമിലൂടെ അഭ്യൂഹങ്ങള് തള്ളിപ്പറഞ്ഞു. 'റൊണാള്ഡോ സ്വയം പ്രഖ്യാപിക്കാത്ത ഒരു കാര്യം, അദ്ദേഹം വിവാഹിതനാകാന് പോകുന്നുവെന്ന് ആളുകള് എന്തുകൊണ്ടാണ് കരുതുന്നത്?' -എല്മ ചോദിച്ചു. ഔദ്യോഗിക സ്ഥിരീകരണമില്ലാതെ മാധ്യമങ്ങള് വാര്ത്ത നല്കുന്നതിനെയും അവര് ചോദ്യം ചെയ്തു. മെദീരയിലെ പള്ളിയില് വെച്ച് വിവാഹം നടക്കുമെന്നും മാധ്യമപ്രവര്ത്തകര് ചിത്രങ്ങള്ക്കായി കാത്തുനില്ക്കുന്നുവെന്നുമുള്ള സോഷ്യല് മീഡിയ വാര്ത്തകളോട് ചിരിക്കുന്ന ഇമോജികള് പങ്കുവെച്ചാണ് റൊണാള്ഡോ പ്രതികരിച്ചത്.
ക്രിസ്റ്റ്യാനോയുടെ വിവാഹ വാര്ത്ത പരന്നതോടെ പോര്ച്ചുഗലിലെ മെദീരയിലുള്ള ഒരു പള്ളിക്ക് മുന്നില് റൊണാള്ഡോയെയും ജോര്ജീനയെയും കാണാന് നൂറുകണക്കിന് ആളുകള് തടിച്ചുകൂടിയിരുന്നു. എന്നാല് അവിടെ വിവാഹച്ചടങ്ങുകളൊന്നും നടന്നില്ല. തങ്ങളുടെ വിവാഹത്തെക്കുറിച്ച് റൊണാള്ഡോയോ ജോര്ജീനയോ ഇതുവരെ ഔദ്യോഗിക പ്രഖ്യാപനങ്ങളൊന്നും നടത്തിയിട്ടില്ല. അവധിയാഘോഷത്തിന്റെ ചിത്രങ്ങള് മാത്രമാണ് ക്രിസ്റ്റിയാനോ തന്റെ സാമൂഹിക മാധ്യമ അക്കൗണ്ടുകളില് പങ്കുവെക്കുന്നത്.
content highlights: Return to Al Nassr or Getting Married? Family Denies Wedding Rumors, Player Posts Cryptic Emoji